Բնակարան վարձակալելու պատճառները կարող են շատ լինել, բայց նպատակը մնում է մեկը՝ անհրաժեշտ է վարձել բնակարան, ցանկալի է բոլոր հարմարություններով, զարգացած ենթակառուցվածքներով և մատչելի գնով։ Մեր հոդվածներից մեկում մենք խոսել ենք անշարժ գույքի շուկայում առքուվաճառքի սեզոնայնության մասին։ Տեսնենք՝ տարվա եղանակը կազդի՞ բնակարանների վարձակալության վրա:
Ո՞ր ամսին է ձեռնտու վարձակալել բնակարան
Պատրաստվու՞մ եք բնակարան վարձակալել. ուշադրություն դարձրեք հետևյալ հանգամանքներին.
Նախ՝ նկատի ունեցեք, որ երկարաժամկետ վարձակալումն ավելի մատչելի է, քան կարճաժամկետը կամ օրավարձովը: Սա անհերքելի իրողություն է։
Երկրորդ՝ վարձակալության գնի վրա ազդում է պահանջարկը։ Որքան մեծ է այն, այնքան սեփականատերերն առավել բարձր գին են պահանջում:
Երրորդ՝ մի՛ մոռացեք տոնական սեզոնի մասին: Ամռան ամիսներին, արձակուրդներին, փառատոնների ժամանակ, երբ զբոսաշրջիկների մեծ հոսք է լինում, տանտերերը նախընտրում են բնակարանն օրավարձով տրամադրել:
Ցավոք, միշտ չէ, որ ժամանակ է լինում մտածելու և սպասելու ձեռնտու տարբերակով բնակարան վարձակալելուն:
Եթե չեք շտապում, ապա սպասե՛ք մինչև հունվար, սա ամենահարմար ամիսն է, քանի որ մարդիկ դեռ ամանորյա տոների տրամադրության մեջ են։ Այդ պահին բնակարանների մեծ ընտրության և ցածր պահանջարկի պատճառով վարձակալության գները նվազում են, և դուք կարող եք բավական գումար խնայել: Անշարժ գույքի շուկայում ակտիվության անկում է նկատվում նաև մայիս-հունիս ամիսներին, երբ ուսանողներն արձակուրդի ժամանակ վերադառնում են ծնողների մոտ, նաև հոկտեմբեր-նոյեմբեր ամիսներին, երբ ուսումնական տարվա սկզբի եռուզեռն անցած է լինում:
Եթե դիմեք անշարժ գույքի գործակալությանը, ապա փորձառու ռիելթորները կօգնեն ձեզ վերահսկել բնակարանների շուկայում տիրող սեզոնային դինամիկան և ընտրել համապատասխան տարբերակ:
Ե՞րբ է ավելի հարմար տեղափոխվել նոր բնակարան
Աշնան անձրևոտ կամ ձմռան ցուրտ ամիսներին շատ դժվար է բնակարանից բնակարան տեղափոխվելը: Եթե հնարավոր լիներ պլանավորել, բնականաբար, բոլորն էլ կնախընտրեին ամռանը զբաղվել տեղափոխության գործերով: Բնակարանային տեղափոխության լավագույն տարբերակը միջսեզոնային ժամանակահատվածն է, երբ և՛ լավ եղանակ է, և՛ ցածր գներ: Եթե այս հարցին մոտենանք հակառակ կողմից, սովորաբար ամսվա ավարտից 2 շաբաթ առաջ սկսում են վարձով բնակարան փնտրել՝ ամսվա սկզբին տեղափոխվելու համար, քանի որ տանտերերը սովորաբար ամսվա առաջին օրերին են բնակարանը հանձնում վարձակալության:
Եզրակացություն
Եկեք ամփոփենք և պատասխանենք ցանկացած վարձակալի հիմնական հարցին՝ ինչպե՞ս վարձել հարմարավետ բնակելի տարածք և խնայել գումար: Դա անելու համար անհրաժեշտ է հաշվի առնել որոշ գործոններ.
1. Պայմանագիր կնքեք մեկ տարով. սա ձեզ կապահովագրի այդ ժամանակահատվածում վարձավճարի հանկարծակի բարձրացումներից:
2. Եթե հնարավոր է, ժամանակ տրամադրեք, կշռադատեք բոլոր դրական և բացասական կողմերը, որպեսզի ստիպված չլինեք մի քանի ամսից հեռանալ:
3. Կապվեք պաշտոնական գործակալությունների հետ՝ խաբեբաներից պաշտպանվելու համար:
Որոշումը միշտ ձերն է: Ռիելթորների հետ և նրանց օգնությամբ դուք միշտ կարող եք գտնել այնպիսի տարբերակ, որը կգոհացնի ձեզ և ձեր ընտանիքին:
