Էլիտար անշարժ գույքին ներկայացվող պահանջներն ու չափանիշները

Այսօր շատերն են նախատեսում գնել էլիտար անշարժ գույք`  բնակվելու, վարձակալելու կամ ներդրումներ կատարելու նպատակով, և դա կարելի է համարել ողջունելի մտադրություն: Ամեն դեպքում, սակայն, եթե ձեզ հետաքրքրում է հենց էլիտար գույքը, նպատակահարմար կլինի գնելուց առաջ հաշվի առնել որոշ հանգամանքներ։ Խնդիրն այն է, որ այսօր ներքին և արտաքին անշարժ գույքի շուկայում չկան էլիտար գույքի հիմնական չափանիշներ: Այսպես, օրինակ, Հայաստանում էլիտար անշարժ գույքի չափանիշներն ու պատկերացումներն այլ են, Ռուսաստանում և Եվրոպայում՝ լիովին այլ: Ժամանակակից մոտեցումներն անընդհատ փոխվում են՝ փոխելով նաև էլիտար սեգմենտի մասին պատկերացումները:

Էլիտար անշարժ գույք. հիմնական չափորոշիչներ 

Իրականում, նույնիսկ նույն երկրի ներսում, նույն քաղաքում առանձնատների, բնակարանների, պենտհաուսների և առևտրային շինությունների համար պահանջները կարող են տարբերվել: Այս հոդվածում մենք կփորձենք թվարկել հիմնական չափորոշիչները.

1. Չափերը. Էլիտար անշարժ գույքը չի կարող լինել խրուշչովյան փոքր նախագծով բնակարան: Պրեմիում դասի բնակարանների մակերեսը պետք է լինի առնվազն 100 քմ, իսկ առանձնատներինը՝ 500 քմ՝ միջբակային տարածքով և ավտոկայանատեղիով։ Առաստաղի բարձրությունը սկսվում է 3 մետրից։ Խոհանոցն՝ առնվազն 20 մ քառ.: Սանհանգույցը պետք է լինի առանձին, և ոչ մեկ հատ (իդեալական տարբերակ է յուրաքանչյուր ննջասենյակում ունենալ մեկական սանհանգույց, ու նաև ընդհանուր սանհանգույց՝ սեփականատերերի և հյուրերի համար):

2. Բացառիկություն. Յուրաքանչյուր տուն բացառիկ է իր դիզայնով: Վերանորոգումն ու հարդարումը կատարվում են թանկարժեք նյութերով՝ օգտագործելով բնական քար և արժեքավոր փայտ:

Առաջին հայացքից կարող է թվալ, որ, օրինակ, Երևանի կենտրոնում  հայտնի «ստալինյան» նախագծով շենքերը՝ ընդարձակ սենյակներով և բարձր առաստաղներով, կարող են լրացնել էլիտար անշարժ գույքի շարքերը։ Բայց ամեն բնակարան չէ, որ պատկանում է պրեմիում կատեգորիայի: Ժամանակը թելադրում է նոր կանոններ, նոր գաղափարներ, նոր պայմաններ, նոր պահանջներ։

Ժամանակակից էլիտար բնակարանի չափորոշիչները

Եկե՛ք միասին դիտարկենք այն պահանջները, որոք պետք է բավարար լինեն, որպեսզի տվյալ տարածքը դասենք էլիտար անշարժ գույքի շարքերը: Այսօր էլիտար սեփականությունները միավորված են բնակելի համալիրներում և ունեն բնորոշ հատկանիշներ:

1. Գտնվելու վայրը. կա՛մ բնակարաններ, տներ քաղաքի կենտրոնում՝ զբոսայգիների ու հրապարակների, ճարտարապետական, պատմամշակութային հուշարձանների մոտ, կա՛մ էլիտար նորակառույցներ՝ էկոլոգիապես մաքուր տարածքներում, հեռու մայրուղուց, աղմուկից և փոշուց:

2. Ֆասադն ունի էսթետիկ գրավչություն։ Եթե դա պատմամշակութային շենք է, ուրեմն ռեստավրացվել է։ Եթե շենքը նոր է, ապա դեկորատիվ երեսպատումը շքեղ է և բացառիկ։ Օգտագործվում են միայն բնական, բարձրակարգ նյութեր:

3. Ավտոկայանատեղի.  բակում մեքենաներ չեն կայանում։ Ցանկալի է ունենալ երկու ավտոկայանատեղի՝ ստորգետնյա (յուրաքանչյուր բնակարանի համար առնվազն մեկ ավտոկայանատեղ) բնակիչների համար և վերգետնյա՝ հյուրերի համար:

4. Ներքին ենթակառուցվածք.  կանաչապատ տարածքներ հանգստի համար, շատրվաններ, սպորտային և խաղահրապարակներ, ֆիթնես ակումբներ, մանկապարտեզներ և ստուդիաներ, SPA սրահներ, լողավազաններ, գեղեցկության սրահներ, սուպերմարկետներ, սրճարաններ և այլն: Ամեն ինչ շատ մոտ պետք է լինի:

5. Ծառայություն. տեխնիկական սպասարկում, մաքրում, աղբահանություն, տարածքի մաքրում։ Առաջին հարկում՝ նախասրահ, որտեղ Ձեզ կդիմավորի աշխատակիցը և կուղղորդի:

6. Անվտանգություն. 24-ժամյա տեսահսկում, տեսախցիկներով դոմոֆոն, անվտանգության ծառայություն, մուտքի կառավարում։

7. Ինժեներական սարքավորումներ. հրդեհի ազդանշան, օդորակման միասնական կառավարում, ընդհանուր հովացման և օդի մաքրման համակարգեր, տաք ջրի և էլեկտրաէներգիայի անխափան մատակարարում:

8. Ժամանակակից տեխնոլոգիաներ. Էկոլոգիապես «կանաչ» և առաջադեմ «խելացի» տներ, հուսալի ջերմա և ձայնամեկուսացում, ջրի մաքրման սարքավորումներ, էներգախնայող երկկողմանի պատուհաններ:

9. Արժեք. Էլիտար անշարժ գույքի բարձր գինը  բացատրվում է բազմաթիվ գործոններով՝ տարածքի արժեքը, կոմունալ ծառայությունների տրամադրումը, բնական նյութերի օգտագործումը, կանաչապատման և կառուցապատողի վարչական ծախսերը: Նշենք, որ վերջին շրջանում Հայաստանում բարձրացել է էլիտար անշարժ գույքի պահանջարկը։