Հայաստանում առկա է ձեռներեցությամբ զբաղվելու բարենպաստ միջավայր, ինչը նշանակում է, որ Հայաստանը կարող է ցանկալի ներդրումային հարթակ լինել օտարերկրացիների համար:
Ըստ տնտեսագիտական վերլուծությունների՝ 2023 թվականին Հայաստանը գրանցել է ՀՆԱ (համախառն ներքին արդյունքի) 8,3% աճ՝ դառնալով աշխարհում ամենաարագ զարգացող տնտեսություն ունեցող երկրներից մեկը: Կայուն զարգացման այդպիսի ցուցանիշներին նպաստել են այնպիսի գործոնները, ինչպիսիք են՝
● Օտարերկրյա ներդրումների նկատմամբ բաց դռների քաղաքականությունը
● Հարկային արտոնությունները և պետական աջակցության ծրագրերը
Այսօր Հայաստանում օտարերկրյա և տեղացի ներդրողների համար ստեղծված են բազմաթիվ հնարավորություններ՝ տեղեկատվական տեխնոլոգիաների, զբոսաշրջության, գյուղատնտեսության, արտադրության և այլ ոլորտներում ներդրումներ կատարելու համար։
Հայաստանում ներդրումային առավել գրավիչ ուղղությունները
Անշարժ գույք: Հայաստանում անշարժ գույքի շուկան ակտիվորեն զարգանում է՝ կառուցվում են բազմաբնակարան շենքեր, բնակելի համալիրներ, հյուրանոցային ևառևտրային շինություններ: Միևնույն ժամանակ գործող օրենքի համաձայն օտարերկրացիները կարող են անշարժ գույք ձեռք բերել Հայաստանում առանց բարդությունների՝ հանդիսանալով անշարժ գույքի լիարժեք սեփականատեր: Այս հանգամանքը թույլ է տալիս օտարերկրյա ներդրողներին ձեռք բերել բնակելի կամ կոմերցիոն անշարժ գույք, գործող բիզնես առանց որևէ խոչընդոտի և ստանալ կայուն եկամուտ գույքը վարձակալությամբ հանձնելուց կամ վաճառքից:
Զբոսաշրջություն: Վերջին տասնամյակում Հայաստան այցելող զբոսաշրջիկների թիվը գրանցում է կայուն աճ: 2023թ․-ին Հայաստան այցելող զբոսաշրջիկների ներհոսքն աճել է 38%-ով: Հայաստանը զբոսաշրջիկներին գրավում է ոչ միայն մշակութային և պատմական հարուստ ժառանգության շնորհիվ, այլև ոլորտի դինամիկ զարգացմամբ: Տարեցտարի Հայաստանում ավելանում են հանգստի ու ժամանցի տարատեսակ ու յուրահատուկ օբյեկտները, զբոսաշրջային ընկերությունների կողմից առաջարկվող ծառայությունների բազմազանությունը, բարելավվում է սպասարկման որակը: Ներդրումային տեսակետից օտարերկրացիների համար կարող է գրավիչ լինել հյուրանոցային համալիրների կառուցումը կամ գնումն ու վարձակալությամբ տրամադրելը, զբոսաշրջային ատրակցիոնների, ժամանցի օբյեկտների ստեղծումը:
Տեղեկատվական տեխնոլոգիաներ: ՏՏ ոլորտը նույնպես կտրուկ զարգացում է ապրում Հայաստանում, շատ տեղական ստարտափներ ձեռք են բերում միջազգային ճանաչում, իսկ միջազգային ճանաչված ընկերություններից շատերը ստեղծում են ներկայացուցչություններ Հայաստանում: Վերջին տարիներին Հայաստանում հայտ են գալիս բազմաթիվ հաջողված տեխնոլոգիական ձեռնարկություններ, ինչին նպաստում է նաև Հայաստանի կառավարության կողմից ՏՏ ոլորտի զարգացմանը նպաստող աջակցության ծրագրերը։
Այլ ոլորտներ: Հայաստանի զարգացող տնտեսության պայմաններում շահավետ կարող է լինել ցանկացած ոլորտում ունեցած ներդրումը: Այս առումով ուշադրության են արժանի գյուղատնտեսությունը, սննդի արդյունաբերությունը, դեղագործությունը, կինոարտադրությունը:
