Կայուն եկամուտ ունենալու մասին մտածում է գրեթե յուրաքանչյուր ոք, ով ունի որոշակի խնայողություններ և չի ուզում դրանք պահել ներքնակի տակ՝ մինչ դրանց արժեզրկվելը: Եվ իրոք, ինչո՞ւ երկար ժամանակ հենց այնպես պահել ազատ ֆինանսական միջոցները, եթե կարելի է դրանցից ստանալ եկամուտ: Միևնույն ժամանակ, սակայն, ոչ բոլորն են պատրաստ ունեցած միջոցները ներդնելու որևէ գործընթացում, քանի որ շատ դեպքերում դա կարող է պարունակել ռիսկեր և գումարը կորցնելու վտանգ:
Այս հոդվածում խոսելու ենք ֆինանսական ներդրումների այն տարբերակների մասին, որոնք չեն պարունակում գումարը կորցնելու ռիսկեր և երաշխավորում են կայուն եկամուտ:
Բանկային ավանդներ
Բանկային ավանդը ամենահասկանալի, պարզ և հուսալի տարբերակներից է՝ նվազագույն ռիսկերով: Ամեն ինչ պարզ է՝ գումարը որպես ավանդ պահում ենք բանկում, ստանում ենք որոշակի տոկոսներով եկամուտ, որը պայմանագրի համաձայն կարելի է կանխիկացնել ինչպես ամսական, եռամսյակային կամ այլ ժամկետային կտրվածքով, այնպես էլ ավանդի ժամկետի ավարտին:
Բանկային ավանդը շատ հարմար է հատկապես այն դեպքերում, երբ ունեցած գումարն այնքան էլ մեծ չէ և չի բավականացնի այլ՝ ավելի խոշոր ներդրումային գործարքների համար: Որպես թերություն կարելի է նշել, որ ավանդը հանդիսանում է պասիվ եկամուտ՝ ցածր եկամտաբերությամբ, ինչպես նաև կա ռիսկ, որ ժամկետից շուտ ավանդն ընդհատելու դեպքում վճարվող տոկոսագումարը կարող է նվազեցվել կամ զրոյացվել:
Բնակելի անշարժ գույք
Անշարժ գույքը վարձակալության հանձնելիս կայուն եկամուտ կարելի է ստանալ ինչպես առանց ներդրումների, այնպես էլ ներդրումների միջոցով:
Եթե դուք ունեք անշարժ գույք, որից չեք օգտվում, ապա կայուն եկամուտ ստանալու իդեալական տարբերակ է գույքը կարճաժամկետ կամ երկարաժամկետ վարձակալության հանձնելը: Ամեն ինչ հիանալի է՝ կայուն եկամուտ առանց ներդրումների:
Եթե դուք չունեք անշարժ գույք, սակայն ունեք բավական ազատ միջոցներ և կարող եք ներդրում կատարել գույքի ձեռքբերման համար, ապա կարող եք գնված գույքը հանձնել վարձակալության և ստանալ ամենամսյա եկամուտ: Անշարժ գույքի ձեռքբերումը ներդրման առավել հուսալի տարբերակ է, քանի որ չկա ներդրումները կորցնելու վտանգ: Ներդրումների այս տեսակի դեպքում հնարավոր ռիսկերից խուսափելու համար անհրաժեշտ է ամենայն ուշադրությամբ ընտրել գույքը և, իհարկե, վարձակալներին:
Կոմերցիոն անշարժ գույք
Առավել բարձր կայուն եկամուտ կարելի է ստանալ կոմերցիոն անշարժ գույքի վարձակալությունից կամ ենթավարձակալությունից:
Ֆինանսական համեմատաբար մեծ միջոցներ ունենալու դեպքում արժե դիտարկել կոմերցիոն անշարժ գույքի կառուցումը կամ ձեռքբերումը, որն այնուհետև կարելի է հանձնել վարձակալության: Այսպիսի դեպքերում սովորաբար ձեռք են բերվում պատրաստի գործող բիզնեսներ կամ կառուցվում շինություններ, որոնք կարելի է վարձակալության հանձնել որպես հյուրանոց, ռեստորան, առևտրի սրահ կամ բիզնես կենտրոն:
Համեմատաբար փոքր ֆինանսական միջոցների առկայության դեպքում կարելի է եկամուտ ստանալ կոմերցիոն գույքի ենթավարձակալությունից: Այս դեպքում կարող եք վարձակալել ամբողջական տարածքներ՝ պահեստներ, բիզնես կենտրոններ և այլն, և վարձակալությամբ հանձնել մի քանի ենթավարձակալների, որոնցից ստացվող գումարի և ձեր նախնական ներդրման տարբերությունը կարող է լինել ձեր ամսական եկամուտը:
Կայուն եկամուտ ապահովող այս ներդրման առավելություններից է համեմատաբար բարձր եկամուտը, հետագայում վարձակալության արժեքը բարձրացնելու հնարավորությունը: Որպես բացասական կողմ կարելի է նշել նախնական խոշոր ներդրումն ու ծախսերը, նաև աշխատատարությունը:
Կայուն եկամուտ ապահովող հուսալի ներդրումների տեսակներից առանձնացրել էինք այսքանը, իսկ եթե ունեք անշարժ գույքի ոլորտում ներդրումներ կատարելու ցանկություն կամ խորհրդատվության կարիք, ապա դիմե՛ք մեզ: Մեր փորձառու խորհրդատուները կօգնեն ձեզ կատարել երաշխավորված արդյունք ապահովող հուսալի ներդրումներ:
